Frá Garðaskóla til Brussel – Ísland náði bestum árangri meðal Norðurlandanna í fjármálalæsi.

Garðaskóli er sigurvegari Fjármálaleikanna 2026

Um 2000 nemendur í 50 grunnskólum þvert á landið spreyttu sig á fjölbreyttum og skemmtilegum spurningum um fjármál í Fjármálaleikum grunnskólanna sem fram fóru dagana 9. – 20. mars 2026.

    Efstu þrjú sætin skipa:

1. 1. Garðaskóli
   2. Grunnskóli Fjallabyggðar
   3. Vogaskóli

Sem fyrr var mikil samkeppni um efstu sætin og er sérstaklega ánægjulegt að sjá góða þátttöku og liðsheild fjölmennra skóla.

Þrír efstu skólarnir fá peningaverðlaun auk þess sem Garðaskóli verður fulltrúi Íslands í Evrópukeppni í fjármálalæsi sem fram fer 18. og 19. maí næstkomandi. Úr hópi allra þátttakenda voru þrír heppnir dregnir út sem fá 30.000 kr. hver og koma þeir úr Tjarnarskóla, Lundarskóla og Víkurskóla.

Fjármálavit óskar sigurvegurunum og öllum þeim sem tóku þátt til hamingju með góðan árangur og þakkar fyrir þátttökuna – án þátttakenda er engin keppni!

Krakkarnir í 10. bekk Garðaskóla fögnuðu fyrsta sætinu ásamt Almari Guðmundssyni bæjarstjóra og kennurum og tóku við bikarnum og ávísun frá Fjármálaviti að upphæði 250.000 kr.

Á myndinni eru verðandi fulltrúar Garðaskóla í Evrópukeppninni í Brussel ásamt kennurum sínum. Frá vinstri: Andri Rafn Ottesen, Berglind Rósa Birgisdóttir, Bergþóra Emma Sigurðardóttir Johnsen, Alexander Kjalar Helgason, Rósanna Andrésdóttir og Heimir Björnsson.

„Við kennararnir í Garðaskóla erum mjög stoltir af nemendum okkar en það voru um 200 krakkar í 10. bekk sem tóku þátt í keppninni fyrir hönd skólans. Við tókum þá ákvörðun strax í haust að taka þetta föstum tökum. Við fundum að það var mikil samvinna meðal nemenda og það er einmitt það sem er gott, þau læra að ræða saman um fjármálin,“ segir Andri Rafn. „Við höfum alltaf tekið stóra og mikla lotu í 10. bekk í fjármálalæsi en erum nú farin að færa fræðsluna neðar í 8. og 9.bekk. Við sjáum að það munar miklu að krakkarnir séu komnir með grunn þegar þeir mæta í 10. bekk en þá er farið vel í bókina Fyrstu skref í fjármálum sem við fáum frá Fjármálaviti.  Okkur hefur fundist áhugi nemenda vera fljótur að koma þegar þeir fá tækifæri til að læra um fjármálin og að gera þau persónuleg eins og að láta þau spara fyrir einhverju sem þau langar í og hvað felst í því að vera í vinnu og fá laun svo eitthvað fátt sé nefnt.“ segir Andri Rafn Ottesen.

Grunnskóli Fjallabyggðar sigurvegari Fjármálaleikanna í fyrra fagnar hér öðru sætinu í ár og fær að verðlaunum 200.000 kr.

Hér eru ánægðir nemendur í Vogaskóla að taka við verðlaunum fyrir þriðja sætið ásamt kennurum sínum Hrefnu Hjartardóttur til vinstri og Rannveigu Möller til hægri. Vogaskóli hefur staðið sig vel undanfarin ár í keppninni og sigrað einu sinni.

Ísland tók þátt í Evrópukeppni í fjármálalæsi

60 nemendur frá 30 Evrópulöndum komu saman í Brussel og kepptu um Evróputitilinn í fjármálalæsi þar sem lið Ítalíu sigraði.

Úrslit Fjármálaleikanna 2025

Grunnskóli Fjallabyggðar sigrar Fjármálaleikana 2025. Þátttakan var nokkuð góð en um 2000 nemendur í um 60 grunnskólum þvert á landið tóku þátt. Samkeppnin um sætin eykst með hverju árinu og metnaður innan skólanna að standa sig vel einnig. Flestir nemendur sem taka þátt eru að skora hátt!

    Efstu þrjú sætin skipa:

1. 1. Grunnskóli Fjallabyggðar
   2. Vogaskóli
   3. Hlíðaskóli

Það var sérstaklega ánægjulegt að sjá mjög góða þátttöku stórra skóla eins og Hagaskóla, Garðaskóla og Árbæjarskóla, en megin markmiðið með keppni sem þessari er einmitt að leyfa sem flestum nemendum að taka þátt í skemmtilegum leik um fjármál og minna á mikilvægi góðs fjármálalæsis.

Þrír efstu skólarnir fá peningaverðlaun auk þess sem Grunnskóli Fjallabyggðar fær að senda tvo fulltrúa í Evrópukeppni í fjármálalæsi sem fram fer í Brussel 22. og 23. maí næstkomandi.

Úr hópi nemenda sem svöruðu öllum spurningum rétt voru tveir heppnir dregnir út sem fá 30.000 kr. hvor og koma þeir úr Hagaskóla og Grunnskólanum í Stykkishólmi.

Grunnskóli Fjallabyggðar fagnaði 1. sætinu ásamt stærðfræðikennaranum Sigurlaugu Rögnu Guðnadóttur, Inga Steinari Ellertssyni Svæðisstjóra hjá Arion banka á Norður – og Austurlandi, Maríu Petru Björnsdóttur og Tinnu Kristjánsdóttir starfsmönnum í útibúi Arion banka í Fjallabyggð.

Vogaskóli hefur verið sigursæll undanfarin ár og fagnar hér 2. sætinu ásamt Rannveigu Möller stærðfræðikennar og Hrafni Guðlaugssyni viðskiptastjóra hjá Sjóvá.

Það voru kátir krakkar í Hlíðaskóla sem tóku við verðlaunum fyrir 3. sætið. Með þeim á myndinni er kennarinn þeirra Elva Dögg Númadóttir, Hrafn Guðlaugsson viðskiptastjóri hjá Sjóvá og Hildur Dröfn Daðadóttir hjá Lífeyrissjóði verzlunarmanna.

Með því að smella á smápeningana hér fyrir neðan getur þú prófað Fjármálaleikana. Þú velur þér skóla og bekk og byrjar.

Evrópukeppni í fjármálalæsi 2024

Fulltrúar Íslands í Evrópukeppninni voru Soffía Hrönn Hafstein og Marinó Máni Harðarson úr Vogaskóla sem sigraði Fjármálaleikana 2024. Ísland hafnaði í öðru sæti af norðurlöndunum og í 12. sæti í allri keppninni og er óhætt að segja að við getum verið stolt af okkar fulltrúum. Það voru síðan Austurríki, Tékkland og Norður Makedónía sem skipuðu þrjú efstu sætin.

Fjármálaleikarnir 2024  

Um 1.8nn nemendur í 55 grunnskólum víðs vegar á landinu tóku þátt árið 2024 sem er  metfjöldi frá því leikarnir fóru fyrst fram árið 2018. Keppnin var hörð um efstu sætin þar sem margir skólar voru að standa sig mjög vel.

 Þrjú efstu sætin skipuðu:

1. Vogaskóli
2. Austurbæjarskóli
3. Grunnskóli Fjallabyggðar

Allir þrír skólarnir fengi peningaverðlaun auk þess sem Vogaskóli fær að sendi fulltrúa í Evrópukeppnina í fjármálalæsi sem fram fór í Brussel 18. og 19. apríl 2024.

Fjöldi þátttakenda svaraði öllum spurningum rétt og úr þeim hópi voru fjórir heppnir dregnir út sem fengu hver um sig 30.000 kr. Þetta voru nemendur í Eskifjarðarskóla, Hlíðaskóla, Árskóla og Barnaskólanum á Eyrarbakka og Stokkseyri.

Vogaskóli fagnaði 1. sætinu með Ásmundi Einari Daðasyni Barna- og menntamálaráðherra. Tveir úr hópnum eru fulltrúar Íslands í Evrópukeppninni í fjármálalæsi.

Austurbæjarskóli hefur verið sigursæll undanfarin ár og fagnar hér 2. sætinu.

Krakkarnir í Grunnskóla Fjallabyggðar stóðu sig vel líkt undanfarin ár og hér taka þau á móti verðlaunafé sem þau segja að komi sér vel fyrir útskriftarferð 10. bekkjar

Austurbæjarskóli sigraði Fjármálaleikana árið 2023

Austurbæjarskóli sigraði Fjármálaleikana 2023 og í annað sinn sem skólinn sigrar keppnina. Yfir fimmtán hundruð nemendur í 42 grunnskólum víðs vegar af landinu tóku þátt í leikunum og fékk Austurbæjarskóli sem sigurvegari leikanna að senda tvo fulltrúa í Evrópukeppnina í fjármálalæsi sem haldin var í Brussel.

Efstu skólarnir hafa allir allir verið í verðlaunasætum síðustu árin en í öðru sæti var  Grunnskóli Fjallabyggðar sigurvegarinn frá því í fyrra og í þriðja sæti var Tjarnarskóli sem hefur frá upphafi verið ofarlega í úrslitum. Allir þrír skólarnir fengu peningaverðlaun.

Á myndinni eru glaðir sigurvegarar Austurbæjarskóla að fagna sigrinum.

Krakkarnir í Grunnskóla Fjallabyggðar hafa staðið sig vel í Fjármálaleikunum undanfarin ár og fagna hér öðru sæti. 

Krakkarnir í Tjarnarskóla fagna góðum árangri í Fjármálaleikunum

Sigurvegarar Fjármálaleikanna 2022

1. sæti  Grunnskóli Fjallabyggðar

2. sæti  Eskifjarðarskóli

3. sæti  Vogaskóli

Sigurvegarar Fjármálaleikanna 2021

1. sæti Áslandsskóli

2. sæti Austurbæjarskóli

3. sæti Tjarnarskóli

Sigurvegarar Fjármálaleikanna 2020

1. sæti Myllubakkaskóli

2. sæti Nesskóli

3. sæti Sandgerðisskóli

Sigurvegarar Fjármálaleikanna 2019

1. sæti Nesskóli

Sigurvegarar Fjármálaleikanna 2018

1. sæti  Austurbæjarskóli

Upplýsingar: fjarmalavit@fjarmalavit.is