Fimmta starfsár fjármálavits er nú í óðaönn að fara í gang og sem fyrr gefur Fjármálavit grunnskólum landsins upplag af kennslubókinni „Fyrstu skref í fjármálum“ eftir Gunnar Baldvinsson. Bókin hentar vel fyrir kennslu í fjármálalæsi í 10. bekk og hafa fjölmargir grunnskólar nýtt sér hana með góðum árangri.

Fjármálavit stendur fyrir kynningum á námsefninu fyrir kennara og var sú fyrsta á þessu skólaári haldin á Sumarsmiðjum kennara í Reykjavík 10. ágúst síðastliðinn.

Líkt og fyrri ár mun Fjármálavit bjóða grunnskólum upp á skólaheimsóknir þar sem fulltrúar Fjármálavits vinna verkefni úr námsefninu með nemendum. Heimsóknirnar hafa gefist mjög vel og fengið góðan róm meðal nemenda og kennara.

Hápunktur skólaársins hjá Fjármálaviti verður Evrópukeppnin í fjármálalæsi. Haldin verður undankeppni milli grunnskóla í fjölmörgum löndum Evrópu um hvaða skóli verður fulltrúi í Evrópukeppni í fjármálalæsi sem haldin verður i Brussel vorið 2019. Austurbæjarskóli er núverandi Íslandsmeistari og sendi glæsilega fulltrúa sína í fyrra til Brussel.